Ekonomia e Shqipërisë po ngadalësohet gjithnjë e më shumë. Ndërsa integrimi në Bashkimin Evropian po bëhet çdo ditë edhe më i largët. Ky është konstatimi që bën raporti BMI Reasearch, një kompani e grupit Fitch (një prej tre agjencive më të rëndësishme të vlerësimit të riskut të kreditit në botë) për riskun që paraqet Shqipëria.
Sipas raportit, “Panorama për reformën në gjyqësor është përmirësuar e ndjekur nga fitorja e kryeministrit Edi Rama i Partisë Socialiste në zgjedhjet e qershorit 2017”. Por, ky është vetëm një optimizëm i vakët.
Ndërsa thekson se interesat e mëdha politike dhe të sistemit gjyqësor po kundërshtojnë këtë proces. “Mbeten interesa vetjakë të lidhura me reformën që e kundërshtojnë procesin e saj, por kjo(reforma) është një kërkesë kyçe për pranimin në Bashkimin Evropian, dhe për këtë arsye ne mbetemi skeptikë që Shqipëria do t’i bashkohet BE brenda dekadës tjetër” thuhet në të njëjtin raport.
Në fakt Shqipëria është në përpjekje për të hapur negociatat të cilat deri më tani nuk kanë pasur dritë të gjelbër nga ana e BE-së por që qeveria dhe kreu i saj Rama kanë nënvizuar se prishmëritë janë për vitin e ardhshëm. Gjithsesi përpara hapjes vendi ynë duhet të plotësojë detyrat që i janë caktuar që nuk lidhen vetëm me hapat e zbatimit të reformës në drejtësi.
BMI parashikon që ekonomia shqiptare do të rritet me 3.6% në vitin 2017, por ai pret që zgjerimi të ngadalësohet në 3.3% vitin e ardhshëm. Kjo është në linjë të kundërt me pritshmëritë e qeverisë shqiptare dhe institucioneve ndërkombëtare që parashikojnë që rritja ekonomike t’i afrohet 4% në afatin e mesëm.
Ndërsa shton se “një kontraktim i vazhdueshëm i sektorit privat dhe një parashikim për inflacion të dobët do të thotë se ne shohim Bankën e Shqipërisë të mbajë një politikë monetare lehtësuese në 18 muajt e ardhshëm edhe nëse rritja ekonomike mund të përshpejtohet”, vlerëson raporti. /Tirana Today
