Trajneri i Kombëtares Shqiptare U-15, Eqerem Memushaj ka folur për grumbullimin e ekipit në prag të sfidës që do të ketë me Malin e Zi në nëntor. Vlonjati shprehet i kënaqur me grupin që ka dhe shpreson të bëjë mirë në këto ndeshje:
“Kemi punuar shume për grumbullimin e ekipit duke vëzhguar të gjithë ekipet shqiptare dhe për të marrë elementët më të mirë. Siç e shikoni edhe nga lista ka lojtarë nga të shumë ekipe të kampionatit shqiptarë. Jemi duke vëzhguar edhe lojtarë që stërviten në Evropë, pasi ka shumë elementë cilësorë. Në Shqipëri e kemi pak të vështire pasi disa qytete nuk kanë strukturën dhe organizimin e duhur për të prodhuar lojtarë cilësorë. Veçojmë këtu Tiranën që ka një infrastrukturë mjaft të mirë dhe ekipe si Internacionali apo Akademia na furnizojnë mjaftueshëm me lojtarë cilësorë.”
Tradita duke përfshirë kosovarët në ekip vazhdon edhe tek 15-vjeçarët, për këtë çështje Memushaj shprehet se: “Ne jemi duke vlerësuar çdo mundësi që na jepet dhe Kosova ka pasur gjithmonë elemente cilësore. Muriqi që luan në pozicionin e mesfushorit ka shprehur dëshirën e vet për të përfaqësuar Shqipërinë dhe ne ia plotësuam. Jemi në kontakte të vazhdueshme me Federatën e Kosovës, pasi ata kanë ekipin e tyre kombëtar dhe duhet bërë shumë kujdes kur diskutohet me ndonjë lojtarë.”
Ndërsa sa i përket kampionatit Shqiptarë vihet re që disa qytete nuk kanë përfaqësues dhe kjo ndodh për shkak të infrastrukturës që u mungon.
“Është për t’u veçuar zona e Tiranës që ka infrastrukturë të mirë e organizim, kjo na jep mundësinë të kemi shumë lojtarë cilësorë. Pres më shumë nga zona e Korçës dhe Elbasanit, pasi dhe atyre nuk u mungon kjo pjesë. Ndërsa që lenë për të dëshiruar janë Lushnja dhe Berati që kanë një organizim shumë të dobët. Nga Flamurtari kemi vetëm një përfaqësues dhe mua më vjen vërtet keq pasi jam vlonjat vetë, por vetëm atë element gjetëm që është i kompletuar”, ka përfunduar tekniku i kombëtares U-15.
