Policia e Pogradecit ka konfirmuar se krimi në familje, që tronditi sot Pogradecin, ka ndodhur për motive të dobëta.
I ati i Bashkim Mekollit, i cili vrau bashkëshorten 49-vjeçare, ka dhënë detajet e para të ngjarjes së rëndë, ku ka rrëfyer edhe fjalët e të birit.
Babai i autorit ka thënë se i biri vuante nga depresioni dhe se ishte në kushte shumë të vështira ekonomike, prandaj e kishte strehuar të birin familjarisht në shtëpinë e tij.
“Djali ka qenë prej kohësh i kuruar me depresion. E kemi çuar disa herë në Tiranë, por nuk na e pranonin. Krimin e ka kryer kur ka qenë jashtë kontrollit. Kishin kushte të vështira. I kam marrë në banesë sepse jetonin në kasolle. Sapo kam dalë nga shtëpia më ka lajmëruar nusja e nipit për vrasjen. Kur kam shkuar e kam gjetur nusen të pajetë, të masakruar, të mbuluar me gjak, ndërsa djali me thikë në dorë vinte vërdallë nëpër oborr”, ka rrëfyer babai i autorit të vrasjes së Demirkë Mekollit.
Ai ka deklaruar më tej se djali dhe nusja “kishin gjithmonë grindje me njeri-tjetrin”.
“Djali dhe nusja jetonin në një dhomë në shtëpinë time. Nusja nuk ishte problematike. Në mëngjes kur u zgjuam nuk kishte probleme. Kur u zgjova në mëngjes ishim mirë”, ka thënë Nexhdet Mekolli.
“Kur e gjeta me thikë në dorë, vinte vërdallë e më thoshte që varrimi të bëhet në Lushnjë, se atje ka prindërit. Nuk e di si ndodhi, nusen e kisha shumë të mirë, të urtë e punëtore”, ka thënë babai i autorit, raporton “Balkanweb”.
Kur e ka parë babai nusen e shtrirë dhe e ka pyetur çfarë ka bërë, ai ka thënë vetëm që ceremonia mortore të kryhet në Lushnjë, ku ka prindërit viktima.
Bashkim Mekolli vrau gruan e tij Demirkë Mekolli, me të cilën ka një djalë 16-vjeçar.
Ai është arrestuar menjëherë nga policia pas ngjarjes dhe është dërguar në Policinë e Korçës, ku grupi hetimor po përpiqet ta marrë në pyetje, por ngaqë është në gjendje të rënduar për shkak të depresionit, nuk ka mundur të japë asnjë detaj.
