Ylli i ri i Levantes në Spanjë, shqiptari Enis Bardhi, i cili luan për Maqedoninë, ka shprehur haptazi dëshirën e tij për të luajtur me fanellën kuqezi.
Bardhi ka dhënë detaje duke shpjeguar përse nuk luan me Kombëtaren Shqiptare, ndërsa shton se është injoruar nga FSHF dhe nga ish-trajneri i U-21, Redi Jupi.
“Kam dashur gjithmonë që të luaj për Shqipërinë, që kur isha 16 apo 17 vjeç. Nuk më ka ardhur asnjëherë asnjë ofertë, më ka kontaktuar një person nga Gjilani i Kosovës si përzgjedhës, por asnjëherë nuk kam pasur një kontakt serioz nga Shqipëria. Ai më tha që Redi Jupi nuk më njihte e duhej të vija në Shqipëri që të më shihte në provë, ndoshta një javë, edhe pse luaja rregullisht me Ujpeshtin.
Në atë periudhë më kërkonte Maqedonia dhe nuk ishte diskutim për provë. Menaxheri im i ka dërguar e-mail dhe i ka shkruar në Facebook Jupit, por nuk ka marrë përgjigje. Menaxheri im, Meriton Berisha, njihej personalisht me të që kur luanin te Dinamo, por Jupi nuk i ka kthyer asnjëherë përgjigje, ndoshta i ka fshirë edhe numrin e telefonit”, ka treguar talenti në një lidhje direkte për “SuperSport”, të cilit i ka mbetur peng që nuk veshi fanellën kuqezi.
“Nuk besoj se ka shqiptar të lindur në Shkup, me familje shqiptare, që nuk do të dëshironte të luante për Shqipërinë. Por ishte joprofesionale sjellja e FSHF që nuk i sheh talentet, duhet të shihen më shumë shqiptarët nga Maqedonia”, tha ai.
