Një 20-vjeçar po transferohej nga Puka drejt dhomave të paraburgimit të Komisariatit të Shkodrës, por iu ka shpëtuar nga duart policisë.
Përgjatë momenteve që po i vendosnin prangat 20-vjeçari është konfrontuar me oficerët e policisë duke u arratisur. Ndërkohë që grupe të FNSH-së kanë zbritur në terren për të bërë të mundur riarrestimin e të riut.
Njoftimi i policisë:
Më datë 09.09.2017, rreth orës 11.00, gjatë kohës që po përgatitej dokumentacioni për transferim në dhomat e paraburgimit të Komisariatit të Policisë Shkoder, është larguar nga dhoma e shoqërimit të Komisariatit të Policisë Pukë i arrestuari Ermirjon Nikja , 20 vjeç, banues në Don Bosko Laprakë Tiranë, i dënuar edhe më parë për “Vjedhje”.
Ky person dyshohet se është autor i grabitjes me dhunë në Gomsiqe të një shtetasi, ngjarje e ndodhur më datë 24.08.2017, i cili u kap më datën 06.09.2017 nga forcat e Komisariatit të Policisë nr 3 Tiranë për llogari të Komisariatit të Policisë Pukë.
Sot i arrestuari Nikja kishte seancën gjyqesore pēr vlerësim të masës së sigurisë ku Gjykata ka vendosur masën e sigurisë “arrest në burg”, ndaj tij.
Për kapjen e tij menjëherë janë nisur në drejtim të Pukës , 6 grupe të FNSH, si dhe forca të shumta nga Drejtoria Vendore e Policisë Shkodër.
Janë ngritur pika të shumta kontrolli dhe është njoftuar Drejtoria Vendore e Policisë Kukës e Lezhë, si dhe Drejtoria Vendore për Kufirin dhe Migracionin Shkodër e Kukës.
Në lidhje me këtë ngjarje , menjëherë Drejtori i Përgjithshëm i Policisë së Shtetit Haki Çako ka urdhëruar Drejtorinë e Standarteve Profesionale në Policinë e Shtetit për të nisur hetimin disiplinor dhe për të marrë masa drastike ndaj gjithë personave përgjegjës për këtë ngjarje , në Komisariatin e Policisë Pukë.
Ndërko, po në lidhje me këtë ngjarje, Drejtori i SH. Ç. B. A, në Ministrinë e Punëve të Brendshme Eduart Merkaj ka nisur një grup kontrolli për të filluar hetimin penal ndaj personave përgjegjës .
Nga Departamenti i Rendit dhe Sigurisë Publike janë nisur specialistët e Rendit për të analizuar shkaqet e rrethanat e kësaj ngjarje. Po punohet intensivisht për kapjen e shtetasit të lartpërmendur.
