Instituti i Statistikave ka publikuar raportin “Indeksi i Çmimeve të Konsumit”, i cili në muajin gusht ka arritur 102,7 kundrejt muajit dhjetor 2015.
Në gusht ndryshimi vjetor i indeksit të çmimeve të konsumit është 1,6%, ndërsa një vit më parë ky ndryshim ishte 2%.
Por, cilat janë grupet kryesore që kanë ndikuar në ndryshimin vjetor të indeksit të çmimeve të konsumit?
Grupi “ushqime dhe pije joalkoolike” ka ndikuar më së shumti në rritjen vjetore të çmimeve në muajin gusht, përkatësisht me 1,26 pikë përqindje.
Më pas vjen grupi “qira, ujë, lëndë djegëse dhe energji”, çmimet e të cilës kanë kontribuar me +0,23 pikë përqindje.
Çmimet e grupit “mallra dhe shërbime të ndryshme” kanë kontribuar me +0,15 pikë përqindje. Çmimet e grupeve “pije alkoolike dhe duhan”, “transporti” dhe “shërbimi arsimor” kanë kontribuar me +0,03 pikë përqindje secili. Çmimet e grupeve “veshje dhe këpucë” dhe “mobilie, pajisje shtëpie dhe mirëmbajtje” kanë kontribuar respektivisht me -0,08 dhe -0,06 pikë përqindje. Çmimet e grupit “argëtim e kulturë” kanë kontribuar me -0,03 pikë përqindje.
Ndryshimet vjetore të grupeve kryesore:
Krahasuar me muajin gusht 2016, rritja më e madhe e çmimeve vërehet në grupin “ushqime dhe pije joalkoolike” me 3,3 %, pasuar nga grupet “mallra dhe shërbime të ndryshme” me 3,0 %, “qira, ujë, lëndë djegëse dhe energji” me 1,1 %, “pije alkoolike dhe duhan” dhe “shërbimi arsimor” me 0,7 %, “komunikimi” me 0,6 %, “transporti” me 0,4 %, etj.
Brenda grupit të ushqimeve çmimet e nëngrupit “fruta” u rriten me 11,0 %, pasuar nga nëngrupet “zarzavate përfshirë patatet“me 7,5 %,
“peshk” me 3,2 %,
“qumësht, djathë e vezë” me 2,6 %,
“sheqer, reçelra e ëmbëlsira” me 2,3 %, etj.
Nga ana tjetër çmimet e nëngrupit “vajra dhe yndyra” u ulën me 3,1 %. Ndryshimi mujor i indeksit është + 0,4 %. Krahasuar me muajin Korrik 2017 rritja më e madhe e çmimeve vërehet në grupet “ushqime dhe pije joalkoolike” me 1,0 %, pasuar nga grupi “transporti” me 0,5 %, etj. Ulja më e madhe e çmimeve vërehet në grupet “veshje dhe këpucë” me 0,4 %.
