Dy të rinj kanë përfunduar në pranga pasi kanë grabitur një person. Ngjarja ka ndodhur në Yrshek, Tiranë, ku Enea Duraj dhe Renato Toska i kanë marrë shtetasit R.S. një shumë monetare dhe disa sende që ky i fundit kishte në çantë.
Nga hetimi me metoda speciale, rezultoi se këta shtetas, më pas e kanë kanosur shtetasin R. S., me qëllim përfitimin e shumës monetare prej 10 000 Euro.
Policia ka sekuestruar në cilësinë e provës materiale shumën e lekëve që R.S. do t’u jepte grabitësve si gjobëvënie.
Shtetasit e arrestuar janë:
– Enea Duraj, 26 vjeç, lindur në Kuçovë dhe banues në Tiranë
– Renato Toska, 28 vjeç, lindur në Ballsh dhe banues në Tiranë
Gjithashtu është bërë shpallja në kërkim e shtetasit:
– E. H., 31 vjeç
Në momentin e ndërhyrjes nga Forca Operacionale, janë konstatuar shtetasit Enea Duraj dhe Renato Toska, të cilët janë arrestuar në kohën e dorëzimit të kësaj shume monetare.
Gjatë kontrollit u janë gjetur dhe sekuestruar në cilësinë e provës materiale, shuma monetare prej 5000 Euro dhe 300 000 Lekë të reja, të cilat i janë vënë në dispozicion nga shtetasi R. S.
Materialet proceduriale iu kaluan Prokurorisë së Rrethit Gjyqësor Tiranë, për veprën penale “Vjedhja me dhunë” e kryer në bashkëpunim dhe “Shtrëngimi me anë të kanosjes ose dhunës për dhënien e pasurisë”, parashikuar nga Nenet 139-25 dhe 109/b të Kodit Penal.
