Disa mite të jetës moderne, kanë lindur në mënyra të ndryshme:si rezultat i studimeve të shtrembëruara, ndryshimit dhe keqinterpretimit të fakteve, apo nga dëshira për të bërë deklarata bombastike, por jo të bazuara në fakte. Por shumë mite shkencore, janë në fakt mashtrime të pastra.
Ka më shumë gjasa që njerëzit të kryejnë vetëvrasje në dimër
Hipoteza se dimri gri dhe i ftohtë, shënon numrin më të lartë të vetëvrasjeve është e kuptueshme, por nuk mbështetet nga statistikat. Një ekip studiuesish në Universitetin Inje në Seul të Koresë së Jugut, rishqyrtoi studimet nga vende të ndryshme, dhe konstatoi se piku i numrit të vetëvrasjeve mbërrin zakonisht në muajt prill dhe maj (në hemisferën veriore). Ai ndryshon në bazë të disa faktorëve demografikë, veçanërisht moshës.
Dëgjimi i muzikës klasike nga fëmijët e vegjël, i bën ata më inteligjentë kur të rriten
Nuk është e sigurtë se ekziston një lidhje midis inteligjencës dhe dashurisë për muzikën klasike. “Efekti Mozart”, sipas të cilit muzika klasike do të përmirësojë inteligjencën e fëmijëve kur të rriten, u prezantua për herë të parë në një studim në fillim të viteve 1990, por që atëherë nuk ka qenë në gjendje të riprodhojë atë efekt në studime të mëvonshme.
Vrapimi zbathur i bën mirë këmbëve tona
Vrapimi zbathur, ka fituar kohët e fundit njëfarë popullariteti. Ata që e rekomandojnë, pretendojnë se vrapimi pa këpucë përmirëson lëvizjen, duke ndikuar në reduktimin e lëndimeve të mundshme. Por një grup studiuesish në Universitetin e Kejp Taunit në Afrikën e Jugut, ka rishqyrtuar të gjitha studimet mbi biomekanikën e vrapimit zbathur, në krahasim me vrapimin tradicional. Nikolas Tarn dhe ekipi i tij, arritën në përfundimin se edhe pse vrapimi zbathur mund të zvogëlojë rrezikun ndaj disa lloj lëndimesh, sidomos në gju, mund të rrisë nga ana tjetër gjasat e lëndimeve të llojeve të tjera, të tilla si thyerja e këmbës.
Çdo njeri duhet të konsumojë të paktën 2 litra ujë në ditë
Dehidratimi sigurisht që nuk na bën mirë, por ideja se duhet të pimë 8 gota (rreth dy litra) ujë në ditë për të qëndruar të hidratuar, nuk ka asnjë bazë të vërtetë shkencore. Sipas studimeve, gjendja jonë mbetet optimale edhe me një sasi shumë më të vogël të ujit. Hainc Vaitin i Dartmouth Medical School, arriti në përfundimin se s’ka asnjë dëshmi se është e nevojshme të pihet pikërisht ujë; ne mund të mbetemi të hidratuar edhe me ndonjë pije tjetër, pasi uji gjendet tek thuajse të gjitha ushqimet.
Alkooli të ngroh
Shumë pijedashës, mendojnë se alkooli i bën ata më rezistentë ndaj të ftohtit. Kjo lloj “palltoje prej birre” krijohet nga zgjerimi i enëve të gjakut, çka bën që më shumë gjak të mbërrijë më afër sipërfaqes së lëkurës. Por në realitet, në vend se të na mbajë ngrohtë, alkooli rrezikon të na shkaktojë hipotermi, sepse ai dëmton aftësinë e trupit për të rregulluar temperaturën.
Ne përdorim vetëm 10 për qind të trurit
Origjina e këtij miti nuk është e qartë, por e sigurt se ajo nuk ka lindur nga studimet serioze shkencore mbi trurin. Për këtë flasin shpesh librat e “rritjes personale”, që pretendojnë të zhvillojnë fuqinë e 90 përqindëshit të papërdorur të trurit. Në fakt, çdo pjesë e trurit është shumë e specializuar, dhe nuk duket se ka zona të papërdorura që duhen mësuar të përdoren.
Kafeina na dehidraton
Nëse konsumojmë shumë çaj apo kafe, mund të na ndodhë të shkojmë më shpesh në banjo, dhe kjo ndoshta për shkak të efektit diuretik të kafeinës, e cila mund të irritojë muskujt e fshikëzës së urinës. Por, edhe nëse ne shkojmë më shpesh në tualet, kjo nuk do të thotë se urinojmë më shumë. Efekti i kafeinës mbi prodhimin e urinës është studiuar në studime të shumta, mes të cilëve edhe nga nutricionistja Keri Rakston, e cila arriti në përfundimin se një përdorim i moderuar i pijeve ku është e pranishme edhe kafeina, nuk ka ndonjë efekt të rëndësishëm në hidratimin tonë të përgjithshëm.
Përshtati për Tirana Today, Alket Goce
