Fermerët e Lushnjës, të cilët njihen si prodhuesit më të mëdhenj, po përballen me vështirësitë e tregut.
Konkretisht, fermerët e Imshtës, fshat në njësinë administrative Bubullimë të Bashkisë së Lushnjës kanë mbjellë 400 hektarë tokë me shalqi këtë verë, por çmimi i tij nuk shkon as 3 lekë për kilogram.
Fermerit Feçorr Musa, prodhimi jo vetëm që nuk shitet, por tashmë e ka kaluar pjekjen teknike dhe nuk vlen më për në treg.
Musa tregon se ka shpenzuar rreth 400 mijë lekë për fidanet dhe shërbimet e tjera dhe ka fituar vetëm 50 mijë, ndërsa prodhimi i është prishur.
“S’e kemi këputur më përpara se nuk kemi patur ku ta çojmë. Po u këput duhet shitur. Ne nuk kemi treg, nuk vjen tregtari ta marrë dhe nuk e dimë shkakun”, thotë ai, raporton Top Channel.
Në Imshtë zgjidhjen e presin nga institucionet duke propozuar rregullimin afatgjatë të tregut, ose bashkimin e fermerëve, apo mbledhjen e prodhimeve në pikat e mëdha të grumbullimit.
“Tregtari s’ka pse vjen e merr tek unë mallin, le ta marrë tek pika e grumbullimit. Kështu ruhet edhe çmimi dhe garantohet shitja e mallit. Kosto vete 50 lekë, ne po e shesim 30 lekë”, thonë fermerët.
Fermerët kërkojnë ndërhyrje të shpejtë që të shmanget abuzimi me çmimet në treg dhe mbetja në parcelë e prodhimit.
