Ka nisur rinumërimi i 4 kutive të para të votimit, pas vendimit të KQZ-së për rihapjen e 64 kutive të votimit.
Vendimi u mor në mbledhjen e djeshme, pas pretendimeve të PDIU dhe PS-së.
Kështu, pas udhëzimeve të anëtarëve të Komisionit Qendror të Zgjedhjeve, numëruesit e kanë nisur punën me 4 kutitë e KZAZ nr.29 të qarkut të Tiranës.
PDIU kërkon të marrë një mandat për Shpëtim Idrizin me rinumërimin e 41 kutive, pasi ky i fundit e ka humbur mandatin për 38 vota. Ndërkohë, edhe Partia Socialiste kërkoi dje rinumërim të 23 kutive, pasi sipas tyre ka mospërputhje mes pamjeve filmike që disponojnë dhe shifrave në tabelat e rezultateve.
Rezultati që do të dalë nga rinumërimi i sotëm do të ndajë nëse mandati do t’i shkojë PDIU-së Shpëtim Idrizit, të cilit i duhen 37 vota që të kalojë pragun për t’u bërë deputet i Parlamentit të ri.
