Gjykata e Apelit në Shkodër dënoi me dy vite burg 50-vjeçarin Filip Shtjefni, i njohur ndryshe si “Tony Montana” i Lezhës.
Shtjefni, së bashku me të dashurën e tij Lula Marku, akuzohen se kanë shfrytëzuar për prostitucion 24 vjeçaren Englantina Metolli në një lokal të marrë me qera në Lezhë. Për tre ditë me radhë, çifti që bashkëjetonte e ka mbajtur të mbyllur në një banesë vajzën dhe e ka keqtrajtuar atë, derisa 24-vjeçarja është hedhur nga dritarja duke tentuar më pas vetëvrasjen.
Gjykata e shkallës së parë në Lezhë e dënoi me dy vite burg Filip Shtjefnin dhe bashkëjetuesen e tij Lula Marku, ndërsa Gjykata e Apelit në Shkodër la në fuqi këtë vendim.
Në sallën e gjyqit, vetë Shtjefni hodhi poshtë akuzat duke thënë se 24 vjeçarja ka ardhur nga Turqia me dëshirën e saj për të punuar tek lokali në Lezhë dhe se 50 vjeçari ka qenë në komunikim të vazhdueshëm me familjen e saj.
Gjithashtu, ai mohon ta ketë keqtrajtuar apo shfrytëzuar për prostitucion të renë. Sipas tij, e vetmja gjë që ka ndodhur është goditja me shpullë ndaj vajzës për një keqshërbim ndaj një klienti në lokal dhe asgjë më shumë.
Edhe vëllai i të ashtuquajturit “Tony Montana”, Dedë Shtjefni e quan absurd këtë dënim të dhënë sepse cilëson se nuk është aspak normale të dënohet me dy vite burg për një shpullë, ndërsa akuzon se në gjykatën e Lezhës i kanë kërkuar para për ta shpallur të pafajshëm Toni Montanën e Lezhës.
Filip Shtjefni dhe Lula Marku, që bashkëjetonin bashkë tashmë kanë edhe një vit burg për të bërë sepse janë arrestuar në korrikun e vitit të kaluar, shkruan BalkanWeb.
24 vjeçarja Eglantina Metolli që pretendon se është keqtrajtuar u njoh në Facebook me Toni Montanën e Lezhës dhe pranoi që të vinte për të punuar në lokalin e tij, por e gjithë kjo përfundoi në një histori me një fund të paparashikueshëm.
