Gramoz Ruçi dhe Ilir Meta vazhdojnë të replikojnë midis tyre. Duke folur me militantët në Libofshë të Fierit, Ruçi u shpreh se presidenti i zgjedhur Ilir Meta duhet të respektojë Kushtetutën dhe jo të bëjë fushatë për Lëvizjen Socialiste për Integrim.
“LSI dhe Ilir Meta ta marrin vesh se në Presidencë do të shkoj presidenti i Shqipërisë, jo presidenti i LSI-së. Nuk është presidenti që përcakton rregullat. Nuk është presidenti që përcakton nëse zgjedhjet janë të lira apo jo. Të manipuluara apo jo nuk i takon atij. Janë numëruesit, komisionarët, KQZ, ku LSI është pjesë etj, ata që vendosin, nuk vendos presidenti. Presidenti ka vetëm një detyrë, të zbatojë kushtetutën. Fituesi të administrojë fitoren, humbësi te dalë në opozitë”, tha Ruçi.
Më herët, Meta u shpreh se “Ruçi nuk do ta kishte kënaqësinë që të më shkarkonte me votë si deputet pasi nuk e kam vënë unë të 9-tin në Fier”.
