Referuar statistikave te Ministrisë së Financave, gjatë 4 mujorit të parë të këtij viti Banka e Shqipërisë ka arkëtuar në buxhetin e shtetit transferim fitimi 908 milion lekë, ose 91 për qind të planit.
Fitimi i transferuar nga Banka e Shqipërisë në buxhetin e shtetit zë një pjesë të vogël të të ardhurave totale buxhetore.
Parashikimi i transferimit të fitimit nga Banka e Shqipërisë për gjithë vitin është 1 miliardë lekë. e njëjta vlerë është transferuar edhe gjatë vitit të kaluar.
Ndërsa në vitin 2015 BSH ka transferuar në buxhetin e shtetit 962 milionë lekë. Banka e Shqipërisë është banka qendrore e vendit tone dhe është e pavarur nga çdo pushtet tjetër për realizimin e objektivit kryesor të veprimtarisë së saj.
Kapitali i Bankës së Shqipërisë përbëhet nga fondi i themelimit dhe fondi i rezervës së përgjithshme, që është 500 për qind e fondit të themelimit të Bankës së Shqipërisë.
Fitimi neto i Bankës së Shqipërisë llogaritet pasi të zbriten nga të ardhurat, shpenzimet e bëra për vitin financiar në fjalë.
25 për qind e këtij fitimi kalon në fondin e rezervës së përgjithshme ndërsa pjesa tjetër e mbetur nga fitimi neto do të përdoret për të kompensuar letrat me vlerë që i janë dhënë Bankës së Shqipërisë.
Fitimi neto, që mbetet pasi bëhen zbritje fondi i rezervës së përgjithshme dhe kompensimet e lartpërmendura, kalon në të ardhurat e buxhetit të shtetit brenda katër muajsh pas mbylljes së vitit financiar.
Fitimi i transferuar nga Banka e Shqipërisë klasifikohet në grupin e të Ardhurave Jo tatimore në Buxhet.
