Ekpi i Kombëtares Shqiptare në ndeshjen ndaj Luksemburgut do të luaj ndryshe nga herët e tjera siç ne jemi mësuar ta shohim.
Sipas burimeve nga FSHF, kjo ndeshje miqësore që do të shërbejë si test përpara sfidës zyrtare kundër Izraelit.
Trajneri De Biasi pritet të hedhë në fushë një skuadër ofensive.
Mësohet se tekniku Italian do të rreshtojë skuadrën me skemën 3-5-2, ku Hysaj dhe Lenjani do të jenë të avancuar nga krahët në mesfushë, ndërsa Sokol Cikalleshi duket se ka fituar balotazhin me Armando Sadikun për një fanelë titullari në sulm, përkrah Odise Roshit.
Por, shqetësimi më i madh te kuqezinjtë lidhet me gjendjen e mesfushorit Amir Abrashi.
Stafi mjekësor dhe ai teknik u shfaqën jo pak të shqetësuar për gjendjen e Abrashit, me situatën e lojtarit që do të monitorohet deri në çastet e fundit, për të vendosur më pas nëse do të jetë në gjendje të luajë.
Në stërvitjen e fundit përpara sfidës me Luksemburgun, ishin të pranishëm 21 lojtarë, me Llullakun dhe Hykën që do ti bashkohen skuadrës në Stamboll për të plotësuar grupin.
Pas kësaj ndeshjeje, në orën 19:00, përfaqësuesja shqiptare do të udhëtojë drejt Stambollit, ku do të qëndrojë në ditët e mbetura përpara udhëtimit për në Haifa, ku do të luajë ndeshjen kualifikuese të Botërorit “Rusi 2018” ndaj Izraelit.
