Kreu i Partisë Demokratike, Lulzim Basha theksoi se ka rënë dakord me kryeministrin Edi Rama se pas 25 qershorit do të të kryejnë ndryshime rrënjësore në Kodin Zgjedhor dhe Kushtetutën e vendit për të vendosur sistemin mazhoritar në zgjedhjet e ardhshme parlamentare.
Basha vuri në dukje se do të zbatohet modeli “recall”, ku zgjedhësit mund të shkarkojnë deputetin e tyre nëse nuk mban premtimet e bëra përgjatë fushatës elektorale pa qenë nevoja për të pritur zhvillimin e zgjedhjeve të ardhshme.
“Do ndryshojmë sistemin zgjedhor. Kam rënë dakord për mazhoritar me Ramën. Qytetarët do të kenë mundësi të shkarkojnë deputetin e tyre nëse nuk mban premtimet. Kam rënë dakord për reformën kushtetuese dhe Kodin Zgjedhor me Edi Ramën. Për mua duhet të aplikojmë sistemin mazhoritar. Nëse një i zgjedhur abuzon me pushtetin, qytetarët nuk duhet të presin zgjedhjet që të vendosin për të. Kjo quhet “recall”. Nëse nuk mban premtimet dhe nëse nuk përfaqëson njerëzit, atëherë njerëzit do të kenë të drejtën që të të shkarkojnë. Kjo do të jetë me Kushtetutë. Ky është koncepti im dhe i Republikës së Re. Rama ka pranuar vetëm reformën kushtetuese. Kjo është diskutuar në çadër për të gjetur modelin më të mirë, dhe modeli më i avancuar është modeli recall, ku karriera e politikanit do të lidhet me vullnetin e qytetarëve”, u shpreh Basha.
