Në një kohë kur kandidati për kryeministër të Kosovës, i koalicionit AAK-PDK, Ramush Haradinaj, premton se hapi i parë i qeverisë së tij do të jetë krijimi i Ushtrisë së Kosovës, rivali i tij për këtë detyrë, Kandidati i LDK-së, Avdullah Hoti, premton se hapat e parë të qeverisë do të jenë në sektorin ekonomik.
Në një intervistë telefonike për Agjencinë e lajmeve Reuters, Hoti, aktualisht ministër i Financave, tha se një nga detyrat e para të qeverisë së re, do të jetë fillimi i negociatave me Fondin Monetar Ndërkombëtar (FMN).
“Kosovës do t’i duhet të negociojë një marrëveshje të re me FMN për të kontrolluar kostot e huamarrjes, pasi kredia aktuale përfundon këtë verë”, i tha ai Reuters.
Hoti ka theksuar se investimi në projekte të mëdha infrastrukturore, siç janë hekurudhat, rrugët rajonale, madje edhe sistemi i ujitjes, i cili do të përmirësonte prodhimin e bujqësisë, është një prioritet për autoritetet në Kosovë.
Kosova ka nënshkruar një marrëveshje dy-vjeçare financimi me FMN-në, në korrik të vitit 2015, me vlerë 184 milionë euro. Në mars, Bordi i FMN-së ka miratuar zgjatjen e kësaj marrëveshje deri më 4 gusht të këtij viti, për t’i dhënë kohë të mjaftueshme avancimit të reformave strukturore që janë duke u bërë.
