Disa media sot kanë shkruar se kryetari i Partisë Demokratike do të kandidojë në Elbasan. Mediat thonë se kreu i demokratëve ka zgjedhur të kandidojë në Elbasan si i pari i listës. Pas tij, pra i dyti në listë do të jetë deputeti aktual i PD-së, Luçiano Boçi. Basha ka kandiduar më parë në këtë qytet, në zgjedhjet parlamentare të vitit 2009, kohë kur theu rekordin historik duke i dhënë PD-së 7 deputetë.
Burime nga Partia Demokratike për Tirana Today hedhin poshtë lajmin se Basha do të kandidojë në Elbasan. Duhet theksuar se akoma nuk janë bërë publike emrat e kandidatëve të Partisë Demokratike për zgjedhjet e 25 qershorit.
Por në qoftë se lajmi do të jetë i vërtetë, kandidimi i Bashës në Elbasan do të bënte bujë për faktin se në këtë qark pritet të ndodhë përplasja fatale për shkak të emrave të partive të tjera që kandidojnë aty.
Në qoftë se Basha kandidon, do të jetë përballë Taulant Ballës nga PS, Monika Kryemadhit nga LSI dhe Aqif Rakipit të PDIU.
