Jepet masa arrest me burg për dy ish-punonjës të hipotekës së qytetit të Shkodrës. Prokuroria ka përfunduar hetimet dhe dërgon për gjykim ish-drejtuesin e Hipotekës së qytetit, Neritan Kalamishi, një ish-jurist në këtë institucion, Marvin Ramovi, të akuzuar për “shpërdorim detyre” në bashkëpunim, si edhe shtetasin Vate Lari, i akuzuar për “falsifikim të dokumenteve” pronësorë dhe “Pastrim të produkteve të veprës penale”.
Në bazë të hetimit të Prokurorisë së Shkodrës, rezulton se ish-kryeregjistruesi Kalamishi dhe juristi Ramovi kanë regjistruar në mënyrë të kundërligjshme pronën me sipërfaqe 23 mijë metra katrorë në Velipojë, e cila ishte përfituar në bazë të dokumenteve të falsifikuar nga ana e shtetasit Vate Lari.
Prokuroria e Shkodrës nisi hetimin në bazë të kallëzimit të një shtetasi dhe, në bazë të veprimeve hetimore ka rezultuar se përfituesi i kësaj prone, Vatë Lari, duke falsifikuar dokumentet zyrtarë të komunës dhe të komisionit të kthimit të tokave, është bërë në vitin 2013 pronar i sipërfaqes prej 23 hektarësh, të cilën e ka shitur menjëherë dhe më tej është larguar në drejtim të Francës.
