Një ditë para protestës së opozitës kundër qeverisë, Basha iu premtoi mbështetësve të tij se do t’u sjellë “Republikën e Re”
Fjalimi i Bashës, në “Çadrën e Lirisë”, i ngjau një ligjërimi elektoral, i dëgjuar më parë edhe nga kryeministri Rama kur ndodhej në opozitë.
Duke folur para mbështetësve të tij, Basha adresoi së sërë premtimesh, duke nisur që nga arsimi, e deri tek dëmshpërblimi i ish-të përndjekurve politikë (një premtim ky që vetë PD nuk e ka mbajtur sa herë ka ardhur në pushtet), të cilat sipas tij do të bëhen realitet në “Republikën e Re”, republikë, e cila sipas Bashës fillon ditën e nesërme me marshimin në bulevardin “Dëshmorët e Kombit”.
“Duke u bashkuar nesër në manifestimin më të madh, të zhgënjyerit dhe socialistët e ndershëm shqiptarë do t’i thonë ndal krimit dhe drogës. Duam një Shqipëri që qeveriset përmes votës së shqiptarëve dhe jo krimit e drogës. Duam ta çlirojmë Shqipërinë nga kriminelët dhe dallkaukët. Nga nesër do të nisim marshimin që do të garantojë zgjedhje të lira dhe të ndershme. Nesër do të bashkohen me ne intelektualët, sportistët, të rinjtë etj. E nesërmja do të hyjë në historinë kombëtare sepse është marshimi më i madh dhe i padëgjuar në dekada”, u shpreh Basha.
Ai i ftoi qytetarët që të bëhen pjesë e protestës së ditës së nesërme, si rruga e vetme për të arritur zhvillimin e zgjedhjeve të lira dhe të ndershme .
“Çdo shqiptar bashkohet nesër për një të ardhme të re, një e ardhme për çdo shqiptar dhe shqiptare. Nesër shqiptarët do të bëhen gati për t’u derdhur në orën 12:00 në shesh. Asgjë më e rëndësishme nuk do të ndodhë në 24 orë se forca e bashkimit dhe drejtësia e kauzës për zgjedhje të lira dhe të ndershme. Mirë se vini qytetarë nga jugu në veri në sheshin e historisë, në sheshin e të ardhmes sonë evropiane”, përfundoi kreu i PD-së.
Partia Demokratike bashkë me aleatët e saj do të zhvillojnë ditën e nesërme në orën 12:00 një protestë në shenjë revolte ndaj qeverisë së inkriminuar, siç e cilëson opozita si dhe për të kërkuar zgjedhje sipas standardeve evropiane, pavarësisht faktit që Bashkimi Evropian i ka kërkuar kreut të Partisë Demokratike të bëhet pjesë e procesit zgjedhor të 18 qershor dhe të mos e bojkotojë atë për interesa personale politike.
