Deputetja e Partisë Demokratike, Majlinda Bregu ka reaguar për qëndrimin e medieve ndaj pranisë së saj përkrah përfaqësuesve të mazhorancës në qytetin e Gjirokastrës me rastin e Ditës së Evropës.
Deputetja Bregu, e cila është shprehur kundër qasjes politike së kreut të Partisë Demokratike, Lulzim Basha ka adresuar një mesazh ndaj atyre që e rreshtojnë politikisht me kryeministrin Rama.
Përmes një postimi në Facebook, Bregu shkruan se Shqipëria meriton të ardhmen evropiane dhe ajo do ta ndjekë Evropën në çdo hap pasi sipas Bregut, unioni përbën fatin e saj politik.
“Është i treti vit që Dita e Evropës udhëton në kryeqendrat e kulturës shqiptare. Sot ishte në Kalanë e Gjirokastrës. Më një performancë të shkëlqyer të Robert Bishës & Fanfara Tirana. Nuk di ku do të jetë vitin tjetër, por do të jem përsëri kudo ku të kujtohet dita e Bashkimit të Evropës!
Të asaj Evrope që u bë fati im politik! Kujtdo nuk i pëlqen, lë të marrë frymë e të mendojë mirë cila është e ardhmja që Shqipëria meriton! Do ta ndjek Evropën kudo të jetë nëpër Shqipëri!”, shkruan Bregu.
