Edi Rama la jashtë listave të emrave të kandidatëve për deputetë disa figura kryesore të Partisë Socialiste.
Një ndër ta ishte edhe Namik Dokle. Ky i fundit shkruan se pas 27 vitesh, do të donte që në vendin e tij të mos ulej “një hajdut pulash”.
Gjithashtu, Dokle shpreh mirënjohje për të gjithë ata që e kanë mbështetur. Duket se lënia jashtë nga lista e kandidatëve për deputetë e ka zhgënjyer deputetin.
Megjithatë, kjo pritej duke pasur parasysh sulmin e shpeshtë që ka bërë vajza e deputetit, Anika ndaj Ramës.
Postimi në Facebook:
27 VJET…
Pas 27 vjetëve, pas 8 legjislaturave të pandërprera në Kuvendin e Shqipërisë, në vendin tim do të ulet një deputet i ri. E uroj përzemërsisht, cilido qoftë! (Vetëm “aman” hajdut pulash të mos jetë!) Pas 27 vjetëve, nga zemra më buron…
MIRENJOHJE për ata mijëra socialistë dhe njerëz të mirë pa dokumente partiake, që më kanë pritur zemërhapur, kanë ecur e punuar bashkë me mua dhe, në disa raste, kanë vënë edhe jetën e tyre në rrezik për të më mbrojtur nga falanga idiote politike.
ADMIRIM për deputetët e Grupit Socialist të viteve 1992-1997, të papërsëritshëm në përkushtim dhe idealizëm, me të cilët sollëm për herë të parë Partinë Socialiste në pushtet.
NDJESE për gjithë ata njerëz me halle e vështirësi në jetë, të cilët nuk munda, apo nuk dita, apo edhe nuk më lanë t’i ndihmoja, kur kishin nevojë.
PERULJE dhe pendesë për ata pak individë që rrallë… shumë, shumë rrallë mund t’i kem lënduar.
FALJE për ata pak individë që më kanë lënduar, edhe pse lëndimi “nuk harrohet kurrë”!
Dhe… përqafime për ju miqtë e fejsbukut!
