Sulmi i Gjermanisë ndaj Polonisë në orët e para të mëngjesit të 1 Shtatorit 1939, shënoi fillimin e Luftës së Dytë Botërore, e cila në Evropë zgjati plot 2077 ditë. Lufta përfshiu vendet që përbënin 80 për qind të popullsisë së botës.
Më shumë se 110 milionë ushtarë u mobilizuan dhe u vunë përballë njëri-tjetrit, në një masakër që në fund shkaktoi mbi 50 milionë të vdekur, dhe plagosjen e 125 milionë të tjerëve. Bashkimi Sovjetik pati humbjet më të mëdha me 27 milionë të vdekur.
Është llogaritur se 24.000 njerëz vriteshin mesatarisht çdo ditë. Dëmi ekonomik nga ajo luftë ishte mbi 500 miliardë franga ari zvicerane. Gjyqet e Nurembergut, përllogaritën edhe dëmin e shkaktuar ndaj shteteve të veçanta të pushtuara nga nazistët. Sipas dokumenteve zyrtarë, vlerësohet se Shqipëria pati 12 mijë viktima në njerëz; 20 mijë shtëpi të shkatërruara.
Ndërkohë 240 mijë bagëti u asgjësuan; 25 mijë kuintalë drithë u rrëmbye, si dhe shumë para të vjedhura nga banka, apo nga plaçkitjet. Pas çlirimit, qeveria komuniste kërkoi dëmshpërblim si nga Italia ashtu e dhe Gjermania, por kërkesat e saj nuk u morën parasysh.
Përgatiti Tirana Today
