Kryeministri i Irlandës, Leo Varadkar, është shprehur se edhe nëse Britania vendos të largohet nga BE pa marrëveshje, bisedimet mes dy palëve do të vazhdojnë me vite të tëra.
“Nuk po vlerësohet plotësisht, ky proces nuk përfundon më 31 tetor. Disa njerëz besojnë se Brexiti përfundon më 31 tetor, me apo pa marrëveshje. Nëse nuk ka marrëveshje, atëherë në një pikë, neve na duhet të fillojmë negociatat sërish dhe çështjet e para që do të diskutohen do të jenë, të drejtat e qytetarëve, marrëveshjet financiare dhe zgjidhja e kufirit irlandez”, ka thënë Varadkar para gazetarëve afër Belfastit.
Kujtojmë se kryeministri i ri britanik, Boris Johnson ka thënë se do ta largojë Mbretërinë e Bashkuar nga BE, me apo pa marrëveshje nga blloku evropian, derisa ligjvënësit britanikë janë zotuar se do të rrëzojnë secilën qeveri që tenton të largojë Britaninë nga blloku evropian pa një marrëveshje.
