7 eurodeputetë pritet që të mbërrijnë në Tiranë, për të negociuar mbi faktorin politik në Shqipëri, pas ngërçit të krijuar me djegien e mandateve e protestave masive në mbarë vendin. Duket se mos gjetja e gjuhës së përbashkët, ka shqetësuar europarlamentarët. Pavarësisht thirrjeve të vazhdueshme për dialog, kjo gjë duket tashmë si mision i pamundur. Dhuna e shfaqur në Parlament dhe jo vetëm, e thirrjet e vazhdueshme për shporrjen e kryeministrit Rama, janë një tjetër pengesë e çeljes së negociatave.
Të mërkurën, në Shqipëri pritet të vijnë 7 eurodeputetë të Komisionit të Punëve të Jashtme të Parlamentit Europian, ku në agjendë do të kenë krizën politike në Shqipëri. Ata do të kenë një konferencë për mediat ditën e enjte, ditën kur opozita do të zhvillojë protestën e radhës.
Kreu i delegacionit dhe Eurodeputeti i Partisë Popullore, Tunne Kelam, i ka kërkuar qeverisë dhe opozitës që të zgjidhin këtë situatë me anë të dialogut konstruktiv. Po kështu, ai ka dënuar retorikën politike që nxit dhunën.
“Ne dënojmë me forcë retorikën politike që nxit dhunën, dhe i kërkojmë opozitës që të riangazhohet me jetën parlamentare. Qeveria dhe opozita duhet ta kapërcejnë këtë situatë nëpërmjet dialogut konstruktiv”.
Në Shqipëri ata parashikohet të takojnë Presidentin Ilir Meta, kryeministrin Edi Rama dhe kreun e PD Lulzim Basha. Pas Shqipërisë, 7 eurodeputetët do të udhëtojë drejt Shkupit.
