Një histori dashurie nga ato si në përralla ka qenë historia e sjellë mbrëmë nga emisioni “Dua të të bëj të lumtur”.
Hurma i ka bërë një surprizë mjaft të veçantë bashkëshortit të saj, Fadilit, me të cilin është e martuar prej 60 vitesh.
Të martuar në moshë tepër të re, mes tyre lindi një dashuri që i ka rezistuar kohës. Hurma rrëfeu dashurinë që Fadili ndiente për të, kujdesin që shfaqte ndaj saj dhe se asnjëherë nuk kishte pasur debate dhe zënka midis tyre. Madje Fadili bëhej xheloz dhe ndiente mungesën e saj kur Hurma nuk ndodhej në shtëpi. Ajo tregoi se nuk ishin ndarë asnjëherë dhe se kudo që udhëtonin, ishin nën shoqërinë e njëri-tjetrit.
Për të falënderuar Fadilin për të gjitha këto vite që ai i kishte falur plot me lumturi dhe që kishte qenë një bashkëshort dhe baba i denjë, ajo e ftoi në emision.
“Kemi rritur sëbashku 7 fëmijë dhe të falënderoj që më ke qëndruar pranë dhe më ke bërë të lumtur. Sot të kam ftuar që të të festoj 80-vjetorin e lindjes që ta kesh kujtim nga unë dhe nga fëmijët”, tha ajo.
Në fund, moderatorja Arbana Osmani kishte rezervuar një surprizë për çiftin, një udhëtim në qytetin e Stambollit. Surpriza e fundit që programi kishte rezervuar për Fadilin ishte festimi i 80-vjetorit të lindjes.
