Gjykata e Posaçme ka ndryshuar masën e sigurisë për gjyqtaren Mimoza Margjeka, nga “arrest në shtëpi” në “detyrim paraqitje”. Ndërsa për Arben Carën bashkëshortin e gjyqtares, Nejton Balin, Klaudio Zhillën dhe avokatin Skënder Damimi janë lënë në fuqi masat e sigurisë të dhëna më herët.
Gjyqtarja Mimoza Margjeka, bashkëshorti i saj Arben Cara, avokati Skënder Demiraj dhe një shtetas tjetër janë prangosur nga policia me urdhër të SPAK, pasi do të merrnin 6 mijë deri në 10 mijë euro për lirimin e të burgosurit Orion Bali, kundrejt “garancisë pasurore”.
Pas arrestimit të Orion Balit në Pogradec me akuzën e dhënies së ndihmës për kalim të paligjshëm të kufirit të emigrantëve nga Lindja dhe Afrika Veriore, vëllai i tij Nejton Bali, u vendos në lëvizje për ta liruar.
Pasi shkalla e parë e la në burg, Nejton Bali së bashku me Klaudjo Zhillën dhe avokatin Skënder Demiraj në bashkëpunimin me njëri-tjetrin kontaktuan burrin e gjyqtares Arben Cara, të cilit i dhanë 6 mijë euro në mënyrë që gruaja e tij gjyqtare të ndryshonte vendimin, të cilin e bëri. Por akuzat e mbështetura edhe në përgjime, Margjeka nuk i pranoi, por i cilësoi si hakmarrje për shkak të dosjeve me peshë që ajo po hetonte.
