Kryetari i Partisë Demokratike, Lulzim Basha ka përkujtuar sot 46 vjetorin e revoltës në burgun famëkeq të Spaçit.
Përmes një postimi në “Facebook”, Basha thotë se kjo ditë të kujton betimin e atyre shqiptarëve që vuajtën në këtë burg pasi dilnin kundër diktaturës, ndërsa thekson se betimi i të burgosurve të Spaçit është në fuqi edhe sot.
Ato dy ditë lire, thotë Basha, ishin më të rëndësishme se e gjithë propaganda e diktaturës.
Postimi i plotë:
Sot kujtojmë me nderimin më të thellë revoltën madhështore të Spaçit! Ato 2 ditë lirie në Burgun e Spaçit ishin më të rëndësishme se e gjithë propaganda e diktaturës sepse rrëfejnë betimin e shqiptarëve për të mos pranuar asnjëherë diktaturën dhe dhunën.
Ky betim është në fuqi edhe sot. Nuk ka ditë më domethënëse se 46-vjetori i revoltës së Spaçit, për të ftuar çdo shqiptar që e do Shqipërinë të lirë nga diktatura e krimit, që t’i qëndrojë besnik betimit për të mos pranuar mbi vete asnjë diktator apo karikaturë diktatori, që mban peng të ardhmen tonë Europiane.
Unë jam krenar që në këtë betejë, Partia Demokratike e Shqipërisë është në anën e duhur të historisë, është në nderim të vlerave për të cilat dhanë jetën heronjtë e Spaçit, është në ballë të saj për të mos bërë asnjë kompromis në rrugëtimin tonë drejt Europës.
Nderim përjetë Heronjve Kryengritës të Revoltës së Spaçit! Zoti bekoftë shpirtrat e tyre dhe çdo shqiptar që ngrihet kundër së keqes! #ShqipëriaSiEuropa
