Ambasadori italian, Alberto Cutillo ka deklaruar në një intervistë televizive se zgjedhjet e 30 qershorit i rrëzon vetëm Gjykata Kushtetuese.
Sipas tij, procesi duhet të vijojë përpara me rezultatet e 30 qershorit, deri në momentin që të ngrihet Gjykata Kushtetuese.
“Nuk ka rëndësi nëse moralisht pranohen apo jo rezultatet, por ato janë fakt. Zgjedhjet e 30 qershorit mund të kundërshtohen vetëm nga një gjykate dhe këtë gjë ia kam thënë edhe të zgjedhurve të PD. Këtë vendim mund ta marri pak më vonë Kushtetuesja kur të krijohet. Tani për tani duhet të ecim përpara me këtë proces që patëm. Ama mua më bëri shumë përshtypje numri i lartë i votave të pavlefshme. Unë e shoh si notë proteste e qytetareve që duhet të lexohet mirë”, deklaroi ambasadori italian.
Cutillo shprehet se në ditët e sotme në Shqipëri ka krizë përfaqësimi dhe këtë gjë ai e justifikoi me zgjedhjet lokale, dhe me deputetët e rinj që janë në kuvend.
“30 qershori në aspektin juridik është një rast i vetëm, unik edhe në historinë shqiptare. Kjo krijoi edhe një klime pasigurie siç u tha në raportin paraprak të OSBE-ODIHR. Kemi një paradoks, për shembull në disa bashki ku kanë votuar 10% i votuesve, në këshilla bashkiak njëra parti ka marrë 100% . Është përgjegjësi e madhe që të votohesh nga 10% e qytetareve dhe përfaqësosh edhe pjesën tjetër”, tha Cutillo.
Diplomati italian tha se zgjidhja e krizës kërkon më shumë përgjegjshmëri nga qeveria, duke i bërë thirrje atyre që ta tregojnë pjekurinë për dialog, me platformë dhe jo me deklarata.
“Të gjithë kanë përgjegjësi, por duhet të shohim përpara në mënyrë pozitive. Mendoj se qeveria është në një pozitë që nuk ka precedentë në Shqipëri dhe më gjerë. Ka të gjithë përfaqësitë politike në pushtet qendror dhe pushtet lokal. Kush ka shumë pushtet, ka edhe përgjegjësi më të madhe, per te ushtruar ne mënyrë me te mire pushtetin, ne mënyrë të përbashkët pa favorizuar njërën palë. Qeveria duhet të tregojë pjekuri për tu hapur ndaj dialogut, jo me deklarata të përgjithshme por duke propozuar një platformë politike për të rinisur një përpjekje kombëtare për reformat”, deklaron ai.
