Avokati i Shoqatës së Bashkive, Jordan Daci deklaroi se Komisioni i Venecias do i kthejë përgjigje Gjykatës Kushtetuese për zgjedhjet e 30 qershorit, për 1 ose 2 muaj. Deklarata e Dacit u bë ditën e sotme në në rubrikën ”Opinion” në News24.
Sipas Dacit, në çdo rast Shqipëria do të dalë e fituar, sepse nga Komisioni i Venecias do të japë vetëm një opinion, dhe vendimi do të jetë nga Gjykata Kushtetuese, për atë që ai e quajti një konflikt politik.
Ndër të tjera, Daci u shpreh se ditën e djeshme, procesi u tentua që të mbahej peng, pasi qeveria kishte si qëllim pengimin e Kushtetueses, në mënyrë që të bllokohej shqyrtimi i çështjes, teksa shtoi se kushtetueshmëria e zgjedhjeve të 30 qershorit, është një ndër kriteret e negociatave me Bashkimin Europian.
Çështja më e nxehtë politike e dy viteve të fundit, që vuri në diskutim legjitimitetin e zgjedhjeve të 30 Qershorit 2019, arriti vetëm ditën e djeshme që të merrej në shqyrtim nga Gjykata Kushtetuese.
Por, pas dhjetë orësh debat, Gjykata Kushtetuese vendosi t’i drejtohet “Venecias”, duke amortizuar kështu të gjitha përplasjet politike të ndodhura sot “në derën” e saj.
Jordan Daci: ”Është lajm i mirë sepse pas disa viteve në mungesë të Gjykatës Kushtetuese, kemi një Gjykatë që ka mungesë në numër, por unë si profesionist e studiues i fushës i kam vlerësuar maksimalisht. Drejtësia nuk do të thotë urgjent. Shqipërisë nuk i kushton 1 apo 2 muaj derisa të dalë Venecia. Opinioni publik duhet t’i jetë falenderuar Shoqatës. Kam bindjen që do fitojmë, Shqipëria fiton në secilin rast sepse do të kemi përgjigje kushtetuese për atë konflikt dhe palët do të vendosin kufijtë.
Ky institucion meriton përkrahje, dhe mungesë paragjykimi të plotë. Edhe nëse humbas apo fitoj një çështje, rëndësi ka të fitojë në mënyrë institucionale. Është lajm i mirë, për ta lidhur me rastin tonë, kishte përpjekje të shumëllojta dhe shumëfishta që bënë përpjekje për shqyrtimin e kësaj kërkese, me veprime të pamoralshme, të paligjshme për të penguar sigurisht gjykimin. Kur kjo kërkesë paraqet interesin më të lartë publik për momentin në vendin tonë.
Tentativa e parë ishte dëshira për të pushtuar Shoqatën e Bashkive, kryesisht nga anëtarë të Shoqatës së Autonomisë Vendore. Kështu që, përfaqësues të pushtetit vendor që u zgjodhën në mënyrë të paligjshme, jo kushtetuese, menduan të mbrojnë karriget e veta. Morën një përgjigje të merituar nga Gjykata e Tiranës.
Vetë procesi i djeshëm u tentua të mbahej peng, që lidheshin me këtë lëvizje që e kishte marrë përgjigje. Qeveria kishte vetëm një qëllim, pengimin e Kushtetueses për të gjykuar çështjen. Është e qartë që një ndër kriteret për hapjen e negociatave është pikërisht gjykimi i çështjes së zgjedhjeve të 30 qershorit, kushtetutshmërinë e saj.”
