Arben Skënderi, kandidati i Bindjes për Bashkinë e Tiranës, deklaron se kryetari i bashkisë Erion Veliaj do të përballet me një notë ndëshkuese këto zgjedhje.
Në një intervistë për ABC News, Skënderi i pyetur në lidhje me zgjedhjet, shprehet se 30 qershori do të jetë në gjendje të mjerueshme.
Pjesë nga intervista:
Si e shihni 30 qershorin? Do ketë ngarkesa?
Arben Skënderi: Alternativa është ajo që i frymëzon njerëzit. Pse duhet të çohen njerëzit te lufta? 30 qershori do të jetë në gjendjen më të mjerueshme.
Ju do të hyni në zgjedhje, pse qytetarët do të votojnë ju?
Arben Skënderi: Unë jam një djalë që i ngjaj shumë të tjerëve në këtë qytet. Ka ardhur momenti që Tirana të drejtohet nga një njeri normal. Sot Kryetari i Bashkisë së Tiranës është i kapur. Gjithë fushatën që po bën thjesht po reciton të njëjtat vjersha si 4 vjet më parë.
Cilat janë pritshmëritë tuaja?
Arben Skënderi: Erion Veliaj do të përballet me një votë ndëshkuese kësaj radhe. Ka ardhur koha që njerëzit ta shohin realisht. Keni për tu çuditur për proporcionin që ka për të marrë Bindja Demokratike. Jemi grupim njerëzish që po zmadhohet çdo ditë. Ne do jemi këtu dhe më të fortë se dje, por askush nga ne nuk ka për ta shitur dinjitetin e vet.
Nuk keni frikë se mund të shkojë si Gjergj Bojaxhi apo Ben Blushi?
Arben Skënderi: Emrat që ju përmendët kanë qenë njerëz që kanë qenë shtojca. Ndërsa ne kemi dalë në opozitë me familjen tonë. Largimi ynë ka qenë për tu distancuar. Ne sot jemi të organizuar me koordinatorë dhe nuk i japim llogari askujt. Unë nuk e shes dinjitetin tim për asgjë.
