Ditën e shtunë në 2 mars, Komuniteti Mysliman i Shqipërisë do të zgjedhë kryetarin e ri. Votimi do të zhvillohet në ambientet e Medresesë, prej ku Këshilli i Përgjithshëm do të përzgjedh kryetarin. I cili do të qëndrojë për 5 vite në krye të KMSH-së.
Agron Hoxha, drejtor i Medias pranë Komunitetit Mysliman në një intervistë për Tirana Today konfirmon se deri më tani tre janë kandidaturat zyrtare. Edhe pse aplikimet përfundojnë ditën e nesërme, në 28 shkurt, Hoxha thotë se mund të ketë edhe emra të tjerë të cilët priten të futen në garë.
“Deri më tani, kryetari aktual Skënder Bruçaj është edhe kandidati i natyrshëm për vazhdimin e një mandati të dytë në krye të këtij institucioni. Përballë tyre kemi dy persona të cilët kanë aplikuar. Është myftiu i Tiranës, Ylli Gurra, i cili edhe ai ka shprehur dëshirën dhe platformën për të drejtuar këtë institucion.
Kandidati i tretë është imami i xhamisë së Golemit, Gëzim Abdishahu, i cili ka studiuar për teologji në Arabinë Saudite. Ai ka qenë edhe inspektor i Komunitetit për ndërtimin xhamive dhe objekteve të kultit.
Edhe pse këto janë për momentit kandidaturat e vetme, mendoj se mund të ketë edhe persona të tjerë që do të marrin pjesë. Pse jo, natyrisht ka pasur shumë të tjerë që në ambiente më të ngushta kanë shprehur dëshirën dhe idetë e tyre sesi mund ta zhvillojnë më shumë këtë institucion. Ky i fundit është i hapur.”
Votimi i fshehtë do të kryhet nga 35 myftinj nga u gjithë vendi, 12 anëtarë të kryesisë së KMSH dhe 45 anëtarë të shoqërisë civile, që me votë të fshehtë zgjedhin kryetarin me një mandat 5-vjeçar, i cili ka të drejtë ri-kandidimi.
“Në Komunitetin Mysliman instanca që zgjedh kryetarin është Këshilli i Përgjithshëm. Parlamenti mysliman i Shqipërisë përfshihet myftinjtë e të gjitha qyteteve, delegatët apo anëtarët e Këshillit nga shoqëria civile të përzgjedhur nga e tërë Shqipëria; si edhe kryesia e Komunitetit Mysliman. Të gjithë këto së bashku afro 90 persona , me votim të fshehtë zgjedhin kryetarin e KMSH-së.
Në mbledhjen e Këshillit të Përgjithshëm ditën e shtunë secili nga kandidatët do të dalë përpara zgjedhësve dhe anëtarëve të Këshillit të Përgjithshëm. Aty do të shpalosin platformën dhe idetë e tij sesi mendon ta zhvillojë më shumë këtë institucion.”
Kandidatët duhet të plotësojnë një sërë kriteresh për të qenë pjesë, si të kenë arsim të lartë teologjik, të kenë mbushur moshën 35 vjeç dhe të kenë përvojë pune drejtuese në organet drejtuese të Komunitetit Mysliman të Shqipërisë. Drejtori i Medias, Hoxha shprehet se përzgjedhja e kryetarit është një vendim shumë i rëndësishëm, pasi roli i tij në shoqëri është mjaft thelbësor.
“Komuniteti Mysliman i Shqipërisë është një institucion i rëndësishëm, përfaqësues i myslimanëve në të gjithë vendin. Padashur të hyjë në pjesën e të qenurit si mazhorancë në raport me popullsinë e këtij vendi. Dhe nëse ka një harmoni a bashkëjetesë fetare me të cilën krenohen të gjithë shqiptarët, kontributin më të madh e ka dhe bashkësia më e madhe fetare në vend.”/ TIRANA TODAY
