Pothuajse në të gjithë mediat tema më e debatuar dhe diskutuar ditët e fundit është fakti se si do të shkojë protesta e opozitës që do të mbahet të shtunën. Kështu në një prononcim për “Tirana Today”, deputetja e Partisë Demokratike Albana Vokshi, është shprehur se protesta ka për qëllim shpëtimin e gjithë vendit. E pyetur nëse protesta do të jetë një mallkim për qeverinë në pushtet, demokratja është shprehur se “besojmë në një Zot dhe në drejtësi”. Por sipas saj, qeveria po përpiqet që të trembë protestuesit.
A do jetë protesta e 27 janarit një “mallkim” për qeverinë në pushtet?
Lëvizja Popullore që nis të shtunën ne Tiranë e që do të shtrihet në të gjithë vendin i dedikohet shpëtimit të Shqipërisë. Besojmë në Zot dhe në të Drejtën që duhet të gëzojë çdo individ në Shqipëri. Përpjekjet e zyrave të propagandës për ta letrarizuar protestën shkojnë sërish në drejtim të censurës dhe trembjes jo vetëm të protestuesve, por edhe të ju gazetarëve.
Cilët do jenë skenarët e mundshëm të opozitës?
Demonstrata nuk është e opozitës. Të shtunën në 27 janar proteston populli shqiptar kundër regjimit korruptiv, kriminal dhe diktatorial të Edi Ramës.
Pozicioni juaj në protestë?
Si gjithë shqiptarët, në protestë për të shpëtuar Shqipërinë!
Mund te na thoni diçka mes bashkëpunimit mes PD-së dhe LSI-së në këtë tubim?
Ritheksoj se protesta e të shtunës nuk është politike. Protesta e të shtunës është lëvizja popullore pa kthim për të rrëzuar Qeverinë e Krimit të Organizuar!
Aleatët e PD-së kanë mbetur disi të pakënaqur nga bashkëpunimi i fundit PD-LSI, si e komentoni këtë situatë?
Protesta e të shtunës është e shqiptarëve dhe për shqiptarët!
Intervistoi: Sejrie Baleta
TIRANA TODAY
