Në 26-vjetorin e themelimit të FRESSH kryeministri Edi Rama falënderoi të gjithë ata djem dhe vajza që mundësuan që PS të merrte e vetme timonin.
Por, Rama tha se ky besim i shqiptarëve ishte një sfidë, teksa tha se është bërë shumë, por ka ende shumë për të bërë.
“Hapja e negociatave për Shqipërinë është fundi i të gjitha iluzioneve të kujtdo tjetër se Shqipëria mund të shkojë në një drejtim tjetër, përveçse drejtimi ku dielli lind, aty ku perëndon. T’i dalësh sot përballë si barrikadë këtij stacioni historik nuk do të thotë të jesh antishqiptar, do të thotë të jesh qorr dhe shurdh dhe i padobishëm për shqiptarët”, tha Rama duke akuzuar drejtpërdrejt opozitën.
Fjala e Ramës:
Sot festojmë një ditëlindje të radhës të FRESSH. Kemi marrë timonin për të drejtuar të vetëm falë kontributit të djemve e vajzave.
Shqiptarët në shumicë e kanë ndjerë dhe e kanë kuptuar se ishte koha për t’ia besuar të gjithë përgjegjësinë e drejtimit të vendit të vetmes fuqi të përgjegjshme që ka ky vend, që është PS.
Kjo është një sfidë, jo një dhuratë. Sfidë me vetveten, një sfidë përballë atyre influencave të së keqes në politikë që ne i shohim dhe i ndeshim edhe brenda nesh.
Duke qenë se në këtë ditëlindje ne takohemi me të parën, unë që t’i falënderoj sot dhe t’u kujtoj sa shumë kemi për të bërë akoma djemve dhe vajzave nga Vlora, nga Fieri, nga Lezha, nga Kukësi, nga Elbasani.
Kemi bërë shumë, por ka ende shumë për të bërë, mos harroni që ka një betejë për të fituar në Tiranë dhe gjithë Shqipërisë, betejë për të fituar përballë atyre që po bashkohen për veten, jo për të shkruar historinë e Shqipërisë që nënshkruan marrëveshjen e integrimit.
Ne të gjithë e ndjejmë se pritshmëria e madhe e njerëzve që na votuan ka ende një mal të tërë për të kapërcyer për t;u takuar me realitetin e qeverisjes që duam të bëjmë për të gjithë shqiptarët.
Përballë kësaj historie, ne duhet të jemi më kokëulur se asnjëherë që nga njëra anë duhet të vetëkorrigjohemi dhe nga ana tjetër nuk mund t’ia dalim të vetëm por vetëm nëpërmjet komunikimit të përditshëm me njerëzit për t’i dëgjuar e për të përballur dhimbjet që u krijon shteti e për t’ua zgjidhur ato.
Kemi zgjidhur 1114 halle të shqiptarëve nga 1600 kërkesa.
Dje në Mirditë u ngrit një mësuese, e cila rrëfeu situatën e saj dramatike me shëndetin. Është me kancer dhe pasi tregoi për përkushtimin dhe kujdesin e skuadrës së mjekëve në pavionin e onkologjisë, tha se prej disa muajsh i është ndërprerë kura për shkak të mungesës së një ilaçi, i cili kushton shumë.
Ka 2 mënyra për të qëndruar përballë historive të tilla: duke thënë se shteti i poshtër i ka ndërprerë kurën mësueses, sepse nuk i intereson shëndeti i saj.
Mënyra tjetër është për të mos e mbyllur bisedën aty, por për të vazhduar betejën për ta.
Jashtë kësaj bisede se kush është më i zoti, që është betejë e kotë se në fakt dihet kush është më i zoti, ne duhet të mbyllim ciklin dhe t’u sigurojmë shqiptarëve me kancer kurën. Brenda 10 ditëve të ardhshme do u sigurojmë jo vetëm mësues, por të gjithëve që kanë nevojë për atë ilaç që ilaçi të mos ndërpritet më.
Kemi çuar para drejtësisë 35 punonjës hipotekash. Përtej zgjidhjes, duhet të shkojmë te shkaktarët e problemeve. Hapja e negociatave për Shqipërinë është fundi i të gjitha iluzioneve të kujtdo tjetër se Shqipëria mund të shkojë në një drejtim tjetër, përveçse drejtimi ku dielli lind, aty ku perëndon. T’i dalësh sot përballë si barrikadë këtij stacioni historik nuk do të thotë të jesh antishqiptar, do të thotë të jesh qorr dhe shurdh dhe i padobishëm për shqiptarët. TIRANA TODAY
