24-vjeçari Ritvan Zykaj qëlloi me breshëri plumbash kallashnikovi në drejtim të kushërinjve, duke lënë 8 të vdekur. Banorët janë rrëfyer për mediat se i riu kishte shfaqur që në adoleshencë shenja të luhatjes së personalitetit, problematik dhe i mbyllur në vetvete.
Sipas tyre, tragjedia ishte paralajmëruar në një farë mënyre, pasi shpesh herë ai u thoshte se ‘do t’ju bëjë hatanë’, shkruan “Panorama”. Pas krimit makabër, kanë nisur edhe analizat e ekspertëve, për të mësuar se për çfarë shkaqesh ndërmori këtë akt.
Pavarësisht faktit se 24-vjeçari kishte shfaqur prej kohësh luhatje humori, paqëndrueshmëri emocionale, apo të shëndetit mendor, janë neglizhuar nga familjarët si shenja të një emergjence për tu vizituar tek mjeku.
Sot ai do të dalë para gjykatës. Mbi 24-vjeçarin rëndon akuza ”Vrasje në rrethana cilësuese, ndaj dy ose më shumë personave”, parashikuar nga neni 79/dh i Kodit Penal. Materialet hetimore i referohen Prokurorisë së Rrethit Gjyqësor Vlorë.
Pasditen e 10 gushtit, Zykaj ka shkuar me automatik në banesën e Demir Zykës, vëllait të gjyshit të tij.
Aty ka vrarë Demir Zykaj, 75-vjeç dhe gruan e tij, Perie Zykaj, 72-vjeç. Më pas ka shkuar në banesën e Besimit (djali i Demirit). Aty ka vrarë Besimin dhe bashkëshorten e tij, Vasilika dhe dy fëmijët, Sarën, 16-vjeçe dhe Ledionin, 8-vjeç.
Kur kanë dëgjuar britma e të shtëna, Azemi (vëllai tjetër i Besimit dhe djali i Demirit) dhe Afërdita, (e shoqja e Azemit) kanë shkuar në banesën e Besimit për të parë se çfarë kishte ndodhur.
Aty janë ekzekutuar dhe ata të dy. Tre viktima janë gjetur të vrarë në oborr, ndërsa të tjerët janë gjetur brenda në banesë.
