Kryeministri Edi Rama u shpreh se është më optimist se kurrë për zgjidhjen e çështjes së 21 janarit, ku u vranë 4 militantë socialistë, në protestën para Kryeministrisë.
Gjatë fjalës së tij në ambientet e Kryeministrisë, në përkujtim të 7-vjetorit të kësaj tragjedie, Rama tha se qeveria e tij po kontribuon që politika të mos e ndalë “këputjen e nyjes që mban lidhur drejtësinë”, teksa tha se Reforma në Drejtësi do vërë edhe drejtësinë e kësaj çështjeje në vend.
“Sot jam më optimist se asnjëherë, jo vetëm sepse besoj te forca që udhëheq drejtësinë, por edhe se kur shpata e kohës ngihet mbi nyje, nuk ka rezistencë që e ndal. Me ndihmën e paçmuar të fuqisë së miqve të mëdhenj ndërkombëtarë, ndërsa ne thjesht po kontribuojmë që politika të mos e ndalë dot këputjen e nyjës që mban lidhur drejtësinë”, tha Rama në mbyllje të fjalës së tij.
Po ashtu, Rama iu përgjigj edhe kritikëve, të cilët i kërkojnë drejtësi atij, teksa tha:
“Pse nuk i fut në burg, jeni të gjithë vrasës, jeni të gjithë hajdutë, jeni që mos qofshi dhe shto ujë akuzash e shto miell mallkimesh. Përballë shpërthimit të zëshëm mund të arrish të dyshosh që këta njerëz nuk e kanë marrë vesh ende ndryshimin e sistemit në Shqipëri, nga sistemi i drejtësisë popullore në shtetin e së drejtës.
Sot kemi jo vetëm një popull që aspiron drejtësinë dhe e pret atë me padurim, por edhe një palë njerëzish të motivuar, politikanësh që shumicës qeverisëse që kanë të gjithë durimin për ta çuar deri në fund shkatërrimin e botës që u ka nxirë jetën kaq shumë shqiptarëve.
A ka humbur drejtësia? Drejtësia pas viteve të diktaturës ka qenë një humbëse e madhe sa herë që padrejtësia e parasë ka qenë palë e interesuar në proces. Sidoqoftë drejtësia ka humbur beteja, por jo luftën.
Sot njerëzit e sfilitur nga ndjenja e drejtësisë që nuk vjen kërkojnë padurim skalpin e fajtorëve, kërkojnë larjen e një hesapi të madh pas një çerek shekulli.”
