Data 21 janar është propozuar të shpallet festë kombëtare, si dita e nisjes së punimeve të Kongresit të Lushnjës në vitin 1920. Ndërsa pritet të hyjë në fuqi 15 ditë pas botimit në Fletoren Zyrtare.
Ky propozim drejtuar kryeparlamentarit Gramoz Ruçi, u firmos nga 22 deputetë të opozitës.
Kongresi i Lushnjes, njihet si një ngjarje e madhe e historisë së kombit tonë, ndërsa u mbajt prej 21 deri më 31 janar të vitit 1920, në të cilin u miratua një akt kushtetues për pavarësinë e plotë të Shqipërisë.
Gjatë ditëve të punimeve, Kongresi zgjodhi këshillin e lartë prej 4 vetash, që do të kryente funksionet e kryetarit të shtetit dhe një këshill kombëtar me 37 persona. Kryeministër u zgjodh Sulejman Delvina.
Kongresi i zhvilloi punimet në shtëpinë e patriotit lushnjar, Kaso Fuga. Në atë Kongres morën pjesë delegatë të zgjedhur nga e gjithë Shqipëria. Qëllimi i Kongresit ishte studimi i situatës së brendshme dhe të jashtme të vendit dhe masat që duhet të merreshin për shpëtimin nga rreziku i copëtimit të Shqipërisë.
