Çështja e emigrantëve mori një vemendje të shtuar, dhe një koment pati nga kryeministri Rama dhe ministri Bushati. Ky i fundit, në një intervistë për BBC, në emisionin “Newshour”, foli në lidhje me marrjen e vendimit të qeverisë shqiptare, për të marrë emigrantët nga Eritrea, të cilët ndodhen në brigjet italiane.
“Po, Italia po na shpëtonte. Shumë shqiptarë u pranuan prej saj gjatë atyre kohëve dramatike. Tani është radha jonë që të kontribuojmë në këtë proces. E di shumë mirë, sepse ka pasur njerëz që na kanë kritikuar.
Na kanë thënë që refugjatët që po ndihmojmë nuk janë nga Italia, por nga Eritrea. Por këtu po flasim për njerëz, në radhë të parë. Ndonjëherë harrojmë që janë qenie njerëzore, dhe së dyti, kjo është një krizë masive. Asnjë vend evropian nuk e përballon dot vetëm”, ka thënë ai ndër të tjera.
Bujar Kapexhiu, përmes penës, ka sjellë karikaturën e radhës me mesazhin: “Me karar”.
Po kështu, edhe kryeministri Rama ka folur për 20 emigrantët që Shqipëria do të marrë nga Italia. Në një intervistë për “Corriere della Sera”, ai ka deklaruar se vendimi nuk është tregti me BE, për çështjen e integrimit, pasi të gjithë duhet të bëjnë pjesën e tyre në lidhje me këtë çështje.
