Ministrja e Shëndetësisë, Ogerta Manastirliu, njoftoi në një deklaratë për mediat se janë testuar 65 raste në Shqipëri, nga të cilët 2 dolën pozitivë dhe 14 të tjerë që kanë pasur kontakte me dy të parët janë në proces.
“Janë testuar 65 raste në laboratorin e virologjisë në ISHP. 2 prej të cilëve kanë rezultuar pozitivë. Në proces testimi janë 14 raste, që i përkasin kontakteve të rasteve që janë identifikuar. Sikurse kemi bërë me transparencë maksimale, do t’ju informojmë për çdo informacion të rëndësishëm për qytetarët”, tha Manastirliu.
“Kemi marrë masat sipas udhëzimeve të OBSH”, tha më tej ministrja. Po kështu u kujtoi qytetarëve që të jenë vigjilentë ndaj masave që janë bërë publike, lidhur me higjenën personale.
Ministrja informoi më tej se Shqipëria ka një “personel të mirëtrajnuar”, për tu përballur me këtë virus.
“Kemi pasur kohë për të bërë trajnime sipas protokolleve të OBSH-së. Ju them të keni besim tek personeli ynë shëndetësor. Nuk është hera e parë që përballemi me këto situata”.
