Bashkimi Sovjetik dhe SHBA, respektivisht përmes KGB dhe CIA-s, kanë ndërhyrë vazhdimisht në çështjet e brendshme të shumë vendeve. Edhe Shqipëria e vogël komuniste, u përpoq në vitin 1948, të ndikojë në rezultatin e zgjedhjeve parlamentare në Itali.
Komunistët italianë, fitimtarë të luftës, kishin shumë shanse për fitore. Një nga debatet me të nxehta, ishte çështja e italianëve të mbetur në Shqipëri. Që ishin integruar me forcë në jetën e vendit, duke u angazhuar si specialistë në fusha të ndryshme.
Mijëra familje italiane kërkonin rikthimin e të afërme të tyre, dhe bënin përgjegjës për këtë qeverinë demokristiane të Alçide de Gasperit. Por ky deklaroi se ata ishin pengje të komunistëve shqiptarë, që ishin miq dhe aleatë te komunistëve italianë.
Duke vlerësuar se kjo çështje po e dëmtonte imazhin e saj, Partia Komuniste e Italisë, ndërhyri pranë komunistëve shqiptarë, që të lironte italianët të ktheheshin në atdhe.
Enver Hoxha vendosi të lironte një grup prej tyre, në shenjë simbolike, dhe pa e zgjidhur problemin. Me synim që të ndihmonte gjithsesi të majtën radikale në zgjedhje. Në fund, falë një operacioni masiv të CIA-s amerikane, zgjedhjet u fituan nga demokristianët. Italia i shpëtoi sferës së Moskës, dhe vazhdoi rrugën e kapitalizmit.
