Shërbimi Informativ i Shtetit (SHISH) feston ditën e sotme 107-vjetorin e saj të krijimit.
Kreu i këtij institucioni, Helidon Bendo është shprehur se SHISH është i përkushtuar maksimalisht në ruajtjen e sigurisë kombëtare dhe mbrojtjen e integritetit, pavarësisë e rendit kushtetues të Shqipërisë.
“Puna, sakrificat dhe arritjet e Shërbimit Informativ të Shtetit na sigurojnë që veprimtaria e tij do të mbështetet edhe në të ardhmen në vlerat që besojmë: ligjshmëria, integriteti, profesionalizmi dhe puna në ekip”, shkruan ai.
Gjithashtu ai i shpreh ngushëllimet e tij ndaj familjarëve që kanë humbur të afërmit nga tërmeti i 26 nëntorit.
Urimi i Bendos për 107-vjetorin e SHISH:
Të nderuar punonjës të Shërbimit Informativ të Shtetit, Sot mbushen 107 vjet nga data e krijimit të Shërbimit Sekret të Shtetit Shqiptar. Duke përfituar nga ky rast, ju shpreh urimet dhe përshëndetjet më të ngrohta. 17 dhjetori i 1912-ës shënon aktin zyrtar të krijimit të këtij Shërbimi, si pjesë e pandarë e themelimit të shtetit shqiptar. Sot, 107 vjet më pas, Shërbimi Informativ i Shtetit është i përkushtuar në ruajtjen e sigurisë kombëtare dhe mbrojtjen e integritetit, pavarësisë e rendit kushtetues. Puna, sakrificat dhe arritjet e Shërbimit Informativ të Shtetit na sigurojnë që veprimtaria e tij do të mbështetet edhe në të ardhmen në vlerat që besojmë: ligjshmëria, integriteti, profesionalizmi dhe puna në ekip.
Të nderuar kolegë, Më lejoni të shfrytëzoj këtë mundësi për të shprehur edhe në emrin tuaj keqardhjen për humbjen e jetëve, shkatërrimin e pronave dhe zhvendosjen e qytetarëve si pasojë e tërmetit të datës 26 nëntor 2019. Ne jemi në mbështetje të kolegëve tanë, familjeve të tyre dhe të gjithë shqiptarëve, të cilët kanë nevojë për ndihmë konkrete.
Së fundi, duke e vënë theksin te përkushtimi juaj i vazhdueshëm, ndjehem mirë që kontributi i punonjësve të SHISH-it për garantimin e sigurisë kombëtare është i mirëvlerësuar nga vendimmarrësit dhe partnerët ndërkombëtarë.
Gëzuar ditën e krijimit të Shërbimit Sekret Shqiptar!
