Tashmë janë zbardhur përgjimet ku dëshmojnë korrupsionin nga mjeku reanimator Fitim Marku. Në datën 23 shtator, në kuadër të operacionit policor të koduar “Skaneri”, u arrestua në ambientet e Spitalit të Traumës mjeku reanimator, Fitim Marku, si dhe u shoqërua mjekja me inicialet S.B., dhe infermierja me iniciale K.B.
Fitim Marku mori ryfshet nga një agjent, i cili ishte infiltruar si pacient te Spitali i Traumës. Pasi infermierja i merr të dhënat pacientit, ai shkon për të bërë skanerin. Infermierja i thotë që më pas të shkojë në korridor dhe të takohet me mjekun. Në momentin që pacienti i thotë mjekut Marku për paratë, ky i fundit i kërkon 100 mijë lekë. Përgjimet se si mjeku merr ryfshet nga një agjent, i cili ishte infiltruar si pacient te Spitali i Traumës, janë siguruar nga “Euronews”.
Pjesë nga përgjimet
Agjenti -Më tha ajo që të prisja këtu në korridor.
Mjeku -Ok më thuaj, si e ke mundësinë tani?
Agjenti -Më thuaj or burrë, më thuaj.
Mjeku -Po ja se këtu është plot me njerëz.
Agjenti -Po sa?
Mjeku -Po ja, njëqindëshe.
Agjenti -100 mijë lekë?
Mjeku -Po.
Agjenti -Ok.
Mjeku -Se këto i ndajmë me të tjerat.
Agjenti -Ato janë punën tuaja. Për sa e marr diskun? Sa vonon?
Mjeku -Ja sa ta bëj gati, ta sjell unë jashtë.
Agjenti -Ok.
Mjeku reumatolog ndodhet në gjendje të rëndë shëndetësore, për shkak se ka pësuar ishemi celebrale. Ai u arrestua të premten brenda ambienteve të Spitalit të Traumës. Mjekut Fitim Marku do t’i komunikohet ditën e sotme masa e sigurisë në spital, pasi ndodhet i shtruar në gjendje të rëndë shëndetësore. Mjeku Marku ka pësuar ishemi cerebrale, e cila sipas raportimeve i është përsëritur sërish pasi e kishte kaluar kohë më parë. Sipas dosjes hetimore, Prokuroria ka kërkuar që ndaj tij të caktohet masa e sigurimit “arrest me burg”.
