15 mars 2008, një fabrikë demontimi armësh shpërthen, duke shkaktuar 26 të vdekur dhe 300 të plagosur. Me dhjetra seanca gjyqësore, por përsëri asnjë zyrtar nuk është pas hekurave. Dhe sot 10 vjet më pas, teksa rrezikohet që çështja të mbyllet, banorët janë të mposhtur.
“Kanë kaluar 10 vjet dhe Gërdeci po mbyllet pa fajtorë. Cilët janë fajtorët, viktimat!? Sepse atyre po i mbetet,”-thonë banorët për Tirana Today.
Zamira Durdaj humbi djalin 8 vjeç, babain dhe kunatën gjatë shpërthimit. Nuk ka munguar në asnjë seancë gjyqësore, zëri i saj është dëgjuar nga të gjithë, veç institucioneve juridike. Ajo ende nuk ka gjetur drejtësi për familjen që humbi. Por, është e vendosur të përmbushë premtimin që bëri në arkivolin e Erit të vogël, edhe nëse kjo do të thotë vetëgjyqësi.
“Kur erdhi Eri erdhi nga Italia, unë i bëra një premtim, ‘mami do të vendosë drejtësi’. Kanë kaluar 10 vjet dhe unë ende nuk kam bërë gjë. Por, nëse fajtorët nuk gjykohen, unë do të bëj vetëgjyqësi. Kam bërë një premtim para trupit të një fëmije dhe unë do të marr hak. Le të merret drejtësia pastaj me mua. Zotit ia fal që ma mori, por njerëzve jo,”- rrëfen Zamira. Tirana Today
