Ministrja e Arsimit, Besa Shahini, në një prononcim për mediat, u ndal tek çështja e tkurrjes së numrit të nxënësve në shkolla. Një ditë pas fillimit të vitit të ri shkollor 2019-2020, ajo iu përgjigj akuzave të parashtruara më herët nga ana e PD-së.
Mes të tjerash, ministrja theksoi se janë 10 mijë nxënës më pak, dhe jo 100 mijë, shifër kjo e dalë në media.
“Trendi i rënies ka filluar që në qeverisjen e PD. Trendi i rënies ka të bëjë kryesisht me rënien e lindjes, që ka të bëjë me të gjithë Europën juglindore.
Suksesi i madh i qeverisë sonë është se braktisja e shkollës ka rënë në mënyrë të ndjeshme, dhe ata që frekuentojnë shkollën e mesme është në rritje. Për shkak të politikave tona arsimore, grupet vulnerabël që kanë braktisur shkollën kanë filluar të përfshihen në arsim”, tha Shahini.
