Analisti Armand Shkullaku tha se qeveria po e kalon procesin me një urgjencë të çuditshme, edhe pse nuk është e nevojshme të ndodhë një gjë e tillë. I ftuar në emisionin “Të Paekspozuarit”, Shkullaku sqaroi se shqiptarët duhet të dinë kush do të negociojë për ujërat tonë, nuk janë vetëm të Edi Ramës dhe Sali Berishës.
“Unë besoj se çështja e kohës nuk është problem për palën shqiptare. Ne nuk kemi ndonjë urgjencë për këtë çështje. Nxitimi i palës shqiptare më duket nxitim i tepruar. Edhe letra që i është dërguar Ilir Metës është e nxituar, mund të ishte bërë sipas ligjit dhe Kushtetutës. Shqipëria nënshkroi një marrëveshje në vitin 2009, ajo marrëveshja u rrëzua nga Gjykata Kushtetuese. Çdo qeveri që do të vinte, duhet t’i thoshte palës greke, marrëveshja ka rënë, atëherë zgjidhja është një arbitër ndërkombëtar. Pse them se ka ardhur nxitimi? Pala greke, ka filluar eksplorimin për të parë nëse ka naftë në dy zonat ekonomike nën këto ujëra. Qeveria shqiptare, i dërgoi një notë ministrisë së jashtme greke ku i kërkonte ndërprerjen e këtij procesi. Kjo ndërprerje mund të ketë probleme për shtetin grek dhe kërkon të ketë sa më parë marrëveshjen.”
I pyetur nëse nxitimi vjen për shkak të vizitës së Tsipras në Shqipëri në prill, Shkullaku u shpreh se ardhja e Tsipras nuk ndihmon Shqipërinë, por është në interes të shtetit grek.
“Ne nuk e kemi këtë nxitim. Edhe nëse vjen Tsipras në prill, është një gjë që i duhet atij. Ne duhet të dimë kush do të negociojë për ujërat tonë, nuk janë vetëm të Edi Ramës dhe Sali Berishës. Mua nuk më pëlqen justifikimi sikur bëhet fjalë për bahçen e Surrelit dhe jo për ujërat territoriale. Pa diskutim, që marrja e statusit kandidat për në BE dhe tani hapja e negociatave, nuk është rastësi që kjo temë hapet kur ne kemi një hall.”
