Kryeministri Edi Rama tha sonte se Greqia ishte e kënaqur me marrëveshjen e vitit 2009 dhe për tre vitet e fundit i është shmangur bisedimeve për të korrigjuar marrëveshjen. I ftuar në emisionin “Real Story” në “Vizion +” Rama tha se ishte qeveria e tij që i kishte kërkuar Greqisë të rihapte çështjen. Ai tha se Greqia ishte e kënaqur me marrëveshjen e 2009-s të arritur me qeverinë Berisha.
Kryeministri tha se 12 miljet janë riregjistruar në OKB që nga viti 1992.
“Së pari unë mund t’i sigurojë të gjithë, se çka po ndodh është himni më solemn i marrëzisë pseudo patriotike. Një marrëzi bazuar tek fakti që jo vetëm ka injorancë, por edhe një nevojë për tu kapur me një fjalë e cila është korrekte ajo e ministrit grek, ku lepuri fle diku gjetkë, tek reforma në drejtësi.
Ministri i jashtëm grek ka konfirmuar çka është e shkruar në nenin 3 të Konventës së Detit. Parimi i 12 miljeve është parim i konventës. 12 miljet janë edhe sot. 12 miljet Shqipëria i ka regjistruar në OKB që në vitin 1992.
Kush e hapi këtë problem? Greqia e hapi këtë problem apo e hapëm ne. Greqia ishte e kënaqur me marrëveshjen e 2009. E hapëm ne, Greqia për 3 vite i iku tavolinës jo për të korrigjuar marrëveshjen por për të mos bërë një marrëveshje të re,” tha Rama.
