Zvicra duket se është e ndarë në dy pjesë kur bëhet fjalë për lojtarët me dy kombësi. Festa me shqiponjë e Xherdan Shaqirit dhe Granit Xhakës pasi i shënuan Serbisë ka nxjerr në pah këtë ndarje që ekziston në kombëtare. Shkak për këtë, është bërë dyshimi se sa e ndjejnë këta futbollistë fanellën me të cilën po luajnë.
Por tashmë duket se edhe talentet e rinj që janë me origjinë shqiptare duket se do të kërkojnë të përfaqësojnë Kosovën ose Shqipërinë pasi tek Zvicra ndjehen si të padëshiruar. Këtë gjë e ka vënë në dukje gazeta më e madhe zvicerane, “Blick”, e cila shkruan se talenti i Sionit, Bastien Thoma mund të largohet nga Zvicra.
Shumë komente janë bërë në këtë postim dhe një pjesë e zviceranëve janë shprehur se shqiptarët kanë të drejtë që po largohen sepse tek Zvicra nuk po marrin respektin e duhur. Ata për këtë fajësojnë vetëm Federatën e Zvicrës, e cila ka mbajtur disa qëndrime aspak të mira në kohët e fundit.
Ka edhe shumë tifozë të tjerë, të cilët shprehen se Zvicra nuk ka më nevojë për lojtarë që nuk janë zviceranë, edhe sikur të vijë vetë Ronaldo. Ata nuk harrojnë pa përmendur edhe festën e Xhakës dhe Shaqirit, ku mes komenteve të shumta, ka nga ata që shprehen se nëse dikush mendon që të festojë dhe njëherë tjetër me shqiponjë, më mirë të largohet vetë nga skuadra.
