Zvarritja e Dybalas mbanë Juventusin në luftë për titull, Lazio bie në fund (Video)

Lazio nuk arrin të ndalë Juventusin edhe pse i rezistoi për 93’ minuta. Bardhezinjtë kanë dalë me një fitore minimale 0-1 nga “Olimpico”, me gol të shënuar nga Dybala në sekondat e fundit. Një ndeshje e luftuar në çdo sekondë nga të dyja palët dhe lacialët kishin neutralizuar Juven deri në atë moment, pasi nuk kishin goditur asnjëherë portën.

Bardhezinjtë kanë dominuar takimin për sa i takon mbajtjes së topit, por nuk kanë arritur të gjejnë rrugën e rrjetës. Miqtë kanë shënuar në minutën e 30-të të pjesës së parë me Lichtsteiner, por goli i zviceranit është anuluar për shkak të një faulli. Para këtij momenti ka qenë Ciro Immobile, golashënuesi më i mirë i Serisë A me 23 gola, që ka shkuar afër golit me një goditje me kokë, por tentativa e tij është ndalur nga Buffon.

Rastet për gola kanë munguar në 45 minutat e dyta dhe duket se të dy ekipet kanë ndier lodhjen pas ndeshjeve të luajtura në mesjavë të vlefshme për gjysmëfinalet e Kupës së Italisë. Kur mendohej se dy ekipet do të ndanin një pikë ka ardhur goli që ka vendosur sfidën, me Paulo Dybala që ka ndëshkuar bardhekaltrit dhe i ka dhuruar një fitore të rëndësishme “Zonjës së Vjetër”.