Zv.drejtori i Përgjithshëm i SHÇBA-së, Adriatik Ago ka deklaruar se ka të dhëna se punonjës policie janë të përfshirë në kultivimin e kanabisit, ndërsa shtoi se janë të përgatitura të çelin hetime.
Gjatë një konference për shtyp, Ago është shprehur se kanë nisur disa hetime në Shkodër dhe Vlorë, lidhur me rastet e abuzimeve nga funksionarë të ndryshëm të Policisë së Shtetit.
Deklarata e tij erdhi në kuadër të një hetimi disamujor, që vuri në pranga 4 punonjës policie të implikuar në kontrabandën e makinave. Po ashtu, Ago shtoi më tej se janë duke u kryer kontrolle ajrore, si dhe plane për marrjen e masave për parandalimin e marijuanës.
“Ministria e Brendshme, përpara një muaji, bëri një vlerësim të situatës së kultivimit të kanabisit në shkallë vendi dhe po e trajton me seriozitet këtë fenomen. Në planin e marrjes së masave për parandalimin e marijuanës është përfshirë edhe SHÇBA. Ministria e Brendshme ka planin e saj të masave, gjithashtu, Policia e Shtetit dhe ajo lokale ka të sajin. Janë duke u kryer kontrolle ajrore sipas grafikës dhe rezultatet u jepen strukturave të posaçme për nisjen e verifikimeve. Ku është roli i SHÇBA-së në këtë drejtim? Ne, pa dyshim, jemi të përfshirë në problemet e njohjes së çështjes, marrjen e informacionit, vlerësimit të tyre dhe pse jo të çeljeve të hetimeve. Paraprakisht, ju bëj me dije se ka të dhëna se ka punonjës Policie të përfshirë, pavarësisht nga roli dhe funksioni që mbajnë dhe ne jemi të përgatitur të çelim hetime për çdo punonjës të përfshirë. Do të bëjmë një takim me këto nivele që të kontrollojmë detyrat e vendosura nga titullari i Ministrisë së Brendshme. Jemi të hapur për të hetuar ndaj çdo punonjësi Policie dhe kemi informacione. Në disa raste kemi nisur hetimet dhe në disa të tjera pritet që të nisin. Hetimet po zhvillohen në Shkodër dhe Vlorë, në lidhje me rastet e abuzimeve nga funksionarë të ndryshëm të Policisë së Shtetit”, tha Ago.
