Flakët e zjarrit përfshinë garazhin e një pallati në zonën e Unazës së Re në kryeqytet, duke rrezikuar seriozisht jetën e banorëve. Flakët fillimisht janë parë në garazh dhe më pas tymi është përhapur në të gjithë pallatin. Si pasojë e zjarrit, 8 persona të moshave nga 23 deri në 50 vjeç kanë pësuar lëndime, kryesisht nga asfiksia.
Dyshohet se zjarri ka qenë i qëllimshëm, dhe se shënjestër ishte njëra nga katër makinat e parkuara na garazhin e pallatit, e cila është në pronësi të vëllait të biznesmenit dhe ndërtuesit Sino Llanaj. Sino Llanaj është një emër i njohur për policinë, dhe i arrestuar disa herë. Shkak i kësaj ngjarje dyshohen të jenë konfliktet e familjes Llanaj. Ndërtuesi Sino Llanaj ka qenë i arrestuar disa herë më parë për mashtrime me shitjen e apartamenteve.
Ekspertiza paraprake
Ekspertiza paraprake për zjarrin që përfshiu garazhin, dyshohet se është i qëllimshëm. Ka dyshime se zjarri është vendosur në një prej makinave në garazhin e pallatit.
Kujtojmë se banorët kanë raportuar se kanë dëgjuar dy shpërthime. Si pasojë e zjarrit, u dogjën katër automjete që ishin të parkuara brenda në garazh.
Çfarë njoftoi policia
Blutë e Tiranës në një informacion paraprak bënë me dije se ngjarja ndodhi më datë 21.06.2022, në Unazë të Re, në rrugën “Aleksandri i Maqedonisë”, në orët e para të mëngjesit. Sipas policisë, zjarri ka rënë në një garazh dhe janë djegur 4 automjete. Si pasojë e zjarrit, janë dëmtuar lehtë dhe kanë shkuar për mjekim në spital shtetasit A. Xh., 28 vjeçe, F. J., 23 vjeçe, D. J., 27 vjeçe, I. Xh., 31 vjeçe, E. Xh., 27 vjeç, E. K., 35 vjeçe, M. B., 48 vjeçe dhe N. B., 50 vjeç, të cilët pasi kanë marrë ndihmën e parë mjekësore, janë larguar. Grupi hetimor ka nisur punën për sqarimin e rrethanave të ngjarjes.
