Një zjarr i fuqishëm ka përfshirë këtë të enjte një zonë të mbuluar me pisha në gadishullin e Sithonia, në veri të Greqisë.
Erërat e forta e kanë bërë të vështirë punën e zjarrfikësve. Ata ndodhen në këtë zonë për të vënë nën kontroll flakët. Të paktën 60 zjarrfikës me 30 automjete, sëbashku me vullnetarë shkuan në vendngjarje që në orët e para të mëngjesit, të asistuar nga 4 avionë Canadair.
E përditshmja Kathimerini shkruan se qielli mbi Sithonia është mbuluar nga tymi. Ai është i dukshëm nga një distancë e largët. Sipas informacioneve të deritanishme, probleme mësohet se ka pasur në fshatin Sarti. Në fshat banorët kanë mbetur pa energji dhe linjë telefonike.
“Situata është e vështirë, erërat e forta po e ndihmojnë zjarrin, që është mbi Sarti”, tha nënkryetari i Bashkisë së Sithonia Paris Deblas për mediat vendase. Zjarri besohet se nisi pranë Platanitsi, në lindje të gadishullit, raporton tvklan.
Një tjetër zjarr shpërtheu po mëngjesin e kësaj të enjteje pranë fshatit Filyro. Varta shpërtheu rreth 10 kilometra në verilindje të Selanikut. Flakët u vunë nën kontroll nga shërbimet zjarrfikëse, të cilët thanë gjithashtu se nuk kishte vatër tjetër aktive në zonë. Banorët e Filyro u evakuuan nga shtëpitë, pasi flakët po i afroheshin fshatit.
Në Selanik, erërat e forta rrëzuan pemë mbi makinat e parkuara, shkatërruar tendat e shtëpive e tabelat në rrugë, ndërsa semaforët dolën jashtë funksionit.
